Boo (बू)

BOO

Log kehte hain swarg aur narak sab yahi bhogna pdta hai. Dev aur daitya sab hum hi mein hain. Log aisa kehte hain.

Us raat neend mein Anshi ko lga jaise koi uske seene par betha aur uska galaa ghont raha hai. Vo chahkar bhi hil nahi pa rahi thi, na hi kuchh bol pa rahi thi. Lagbhag ek minute chhatpatane ke baad achaanak vo ek lambi saans lete huye uthi aur apne hostel room mein khud ko akela paya.

Sleep paralysis... Jab dimag jaag jata hai par shareer soya rehta hai. Paani peete huye Anshi ko ehsaas hua ki Maria room mein nahi thi. Raat 3:30 baje hostel se bhaag kar vo aaj phir, hostel ki purani B-Wing ki taraf gayi hogi. Pata nahi us purane khandar mein use kya milta tha. koi kisi ko maar kar agar laash vahin phenk de, to bhi kayi hafto'n tak kisi ko naamo nishan na mile.

Subha college mein foxy ke liye kuchh biscuits daalne ke baad vo lecture ke liye daudi aur dekha ki Maria already class mein hai.

Maria - hello...

Anshi - hello... Long time, no see?

Maria - tu soyi rehti hai, main jaagti rehti hu.

Anshi - room mein to nahi thi tu?

Maria - B-wing ki terrace pe, ledge se bahar perr latka ke... phookne ka maza hi alag hai.. Koi guard nahi, tension nahi.

Anshi - wapas kab aai?

Maria - subha, phir books uthaai aur aa gayi, tujhse pehle.

Anshi ko Maria me se ek ajeeb si boo aai.

Anshi - tu kabse nahi nahaayi hai yar?

Maria - umm.. I guess 27 din ho gaye aaj.

Anshi - yar kya karna chahti hai.

Maria - filhal ma'am yahi dekh rahi hain, main pdhna chahti hun. Shut up. Shh...

Shaam mein wapas aate waqt, anshi ne dekha ki canteen ke paas vo biscuits jaise ke taise pde hain. Kuchh aur aage jaake dekha foxy dard se karaah rahi thi. Ulti kar kar ke uska bura haal tha. Anshi ne Maria ko madad ke bulaya..

Anshi - Maria... Yar isko doctor ke paas le chalte hain, zara help kar yar!!

Maria - Nahi.

Maria naa mein sir hila kar vahin jadd khadi rahi. Foxy aur anshi ko chupchap dekhte huye.

Baad mein kuchh aur log milkar foxy ko auto rikshaw mein ek veterinarian ke paas le gaye.

Agle din shaam tak foxy ki haalat mein kuchh sudhaar tha... Par ab vo kuchh chidchidhi Jaan pdti thi. Pehle si khushgawar nahi. Us din ke baad Anshi bhi Maria se khafaa hi thi. Foxy vale qisse ke liye usne Maria ko maaf nahi kiya tha.

Anshi ne dusri ladkiyo ke saath Maria ko darane ka plan banaya. Kuchh dino baad jab Maria aadhi raat nikli to Anshi, Pooja aur Kamini bhi uske pichhe chal diye. Hostel se niche utarte waqt Kamini ko foxy ne dekh liya aur rone lagi... Gaurd ke darr se Kamini usko chup karane lagi.

Kamini  - shh.. down foxy.

Pooja - chup chup.

Kamini - shh shh.. come here foxy... chup.

Anshi - arre ye pakadwa degi. Isko pichhe ki taraf le ja... Hum vahin B-wing milenge tujhe.

Kamini foxy ko hostel se dur le jaati hai. Anshi aur Pooja B-wing ki ore nikal pdti hain.

Gumm hone vala andhera. Sirf apni saanse aur jhinguro ki awaaz sun pa rhi thi Anshi aur Pooja. Khandarnuma jagah mein har jagah bas jhaad aur dhool.

Pooja - mujhe darr lag raha hai yar!!!

Anshi - lag to mujhe bhi raha hai.

Pooja - To phir...

Anshi - nahi wapas nahi jaenge. Us Maria ki bachhi ko sabak sikhana hai.

Pooja - Hai kahan vo?

Anshi - I know, vo kahan pe hogi.

Darrte ghabraate dono B -wing ki terrace tak pahunche aur dekha ki Maria chhajje se perr bahar latkaye, haath mein jalti ciggerate liye aasman mein ek takk ghoor rahi thi... Shayad kuchh gunguna bhi rahi thi. Kuchh der usko dekhne ke baad Anshi aur pooja ne usko daraane ka socha. Anshi ne kuchh kanastar sarkaye par Maria nahi palti. Phir kuchh der baad anshi ne kuchh jhaad hilaane shuru kiye. Jab Maria ne dhyan nahi diya to dheere dheere usne aur zor lagana shuru kiya. Pooja bhi kuchh darawani aawaze nikalne lagi. Maria aakhir palti aur dheere se utar kar chhajje ke pass hi khadi ho gayi. Chupchap khadi hokar vo kuchh dhoondhe lagi. Aur phir zoro se hassne lagi.

Maria - tum log soch rahe ho mujhe dara doge. Main Roz aati hu yahan. Mere alawa koi bhoot nahi hai yahan. Bahar aa jao...

Kuchh der ruk kar Anshi aur pooja dheere se bahar aa jate hain. 

Anshi - thik nahi kiya tune us din.

Maria zor zor hasti rehti hai.

Pooja - arre tujh mein se kaisi smell aa rhi hai ye??

Maria halke se muskurati hai aur phir dheere dheere paaglo ki tarah zoro se hasne lagti hai. Tabhi Kamini bhi uppar aa jaati hai aur uske pichhe pichhe foxy bhi terrace pr aa jaati.

Kamini - Oh.. here you are?

Pooja - Arre isko kyun le aai??

Anshi - Pagal hai kya tu?

Kamini - Ye khud hi pichhe pichhe aa gayi. Maine to bahut bhagaya. Ye saddne ki kaisi smell aa rhi hai?

Maria - aao ledge pe beth jao. It's a nice breeze here...

Foxy Maria ko dekh kar gurrane lagti hai aur bhaagkar uski taraf daudti hai. Vo Maria ke uppar jhapatne ke liye koodti hai par Maria ek taraf hatt jaati hai. Foxy 5th floor se niche gir jaati hai. Teeno ladkiya chilla kar terrace se niche dekhti hain.

Foxy ke karhaane ki awaaz durr tak goonj uthti hai. Mahaul mein maut ke baad vala sannata chha jaata hai. Kuchh der baad is sannate ko cheerti hui Maria ki awaaz sabke kaano mein pdti hai.

Maria - Badbu aati hai na mujhse!!

Baqi teeno ghabra kar neeche daudte hain. Ek manzil se dusri utarte huye... Bahut bahut saare kutto ke bhaukne aur rone awaaz badhti jaati hai. An-ginatt awaaze. Kayi kilometro durr tak... Saari ladkiya ghabrai haanfti hui apne apne hostel rooms pahunch to jati hain, par raatbhar vo teeno hi na kuchh bol saki, na hi so saki.

Saari raat kutte bhaunkte rahe... Log kehte hain ki poore ek hafte tak poore sheher mein kutte bhaunkte rahe. Har raat.

Us raat sote huye Anshi ko phir sleep paralysis ka daura aaya. koi uske seene pe betha hai aur uska galaa ghont raha hai. Vo chahkar bhi hil nahi pa rhi thi, na hi kuchh bol pa rhi thi. Bas us raat usne seene pe bethi us aakriti ka chehra bhi dekh liya tha. Vo Maria ka chehra tha. 

Subha hote hi usne room change karne ke liye application daal di. Vo kabhi dobara us kamre mein Maria ke saath nahi ruki. Poora college foxy ko lekar dukhi tha.

Pooja - Dekha kya usko??

Anshi - Nahi... Us din ke baad to nahi.

Pooja - Kamra locked hai us hi din se. Knock Karu??

Anshi - Nahi.

Pooja - Karte hain na!!

Anshi - Nahi... Ab usse koi matlab nahi.

Pooja - Kamini bol rahi thi bhaunkti hai raat ko room me andar vo. Humein chidhane ke liye.

Anshi  - Hmm... Karne do.

Pooja - Kaise log hote hain ye?

Anshi - Samjhne ki koshish hi fizul hai. Kuchh chizo'n ko unke haal pe chhod dena chahiye. Hum chahkar bhi nahi samajh paenge.

Pooja - Hmm...

Kuchh 3 hafte baad gaurds ne maria ki body ko room ka darwaaza tod kar nikala. Maria ki  khabar sunkar bhi Anshi ko kuchh zyada farq nahi pda. Log kehte hain kuchh samay se uske kamre se Maria ke bhaunkne ki aawaz aati thi...

Log kehte hain ki le jaate waqt uski poori body par kaatne ke ghaav the. Log kehte hain ki Maria marne se pehle kattkhani aur aadamkhor ho gayi thi. Log aisa kehte hain.

Anant